На 3.7.2022 година, во денот кога Црквата го прославува светиот отец наш Наум – Охридскиот Чудотворец и основоположник на словенското монаштво, Неговото Блаженство, Архиепископот Охридски и Македонски г.г. Стефан чиноначалствуваше на Света Архијерејска Литургија во храмот посветен на свети Наум во скопската населба Радишани. На Архиепископот му сослужуваа Нивните Високипреосвештенства, Митрополитите: Повардарски г. Агатангел и Брегалнички г. Иларион и Неговото Преосвештенство, Епископот Будимски и администратор Темишварски г. Лукијан од Српската Православна Црква, како и бројни ставрофорни протојереји, јеромонаси, јереји, протоѓакони и ѓакони од МПЦ и СПЦ.
Литургиското благолепие на денешниот празник беше дополнително разубавено со прекрасното пеење на хорот на Соборниот храм „Света Троица“ во Ниш.
Многубројниот верен народ којшто го беше преполнил храмот се причести со светите Христови Тајни.