Ново издание на Скопската епархија

Скопската православна епархија со пасхална радост ја претставува книгата „Изреки и поуки“ од ава Доротеј која денес излезе од печат, а е дел од едицијата Библиотека Свети Отци.

Кој е ава Доротеј? Ава Доротеј од Газа живеел кон крајот на шестиот и почетокот на седмиот век. Уште од рана младост започнал со изучување на светските науки, особено ја сакал реториката. Откако го оставил земното благо, се замонашил во манастир помеѓу Аскалон и Газа, во Палестина, и останал некое време кај познатите старци Варсануфиј и Јован. Од почетокот бил задолжен за прием на странците и гостите во манастирот, а потоа се грижел за манастирската болница. По смртта на своите учители заминал од општожитие и станал игумен на друг манастир. Можеби од тоа време потекнуваат неговите поученија, кои ги изговарал пред своите ученици. Од него се сочувани, до денес, дваесет и едно поучение и неколку посланија запишани во оваа книга. Таа набрзо постанала основен прирачник за општожитие, особено ценета од преподобниот Теодор Студит. Авторот се послужил со постари литературни извори, стремејќи се да ги доведе во совршен облик предавањата кои веќе постоеле и аскетското искуство кое веќе се собирало. Како што забележува отец Георгиј Флоровски, тој помалку се задржува на теолошките теми одошто на неговите поуки кои имаат особено практичен карактер. Тие го прикажуваат начинот на борбата со страстите и воспоставувањето норми за монашкиот етос. Првосоздадениот човек во рајот пребивал „во размислување и молитва, во секаква слава и чест“. Гревот бил отпаѓање од размислувањето во „неприродна“ состојба, чија крајна последица била смртта. Од тоа стојалиште ава Доротеј започнува со своите совети. Од гревот и смртта нѐ избавил Богочовекот, Новиот Адам. Во крштението е начелото на новиот живот, изворот на слобода за добродетели. Но сепак, слободата се остварува само во подвиг, во кој најважно од сѐ е –одрекување на својата волја и желби, или поинаку речено, совршено потчинување кон избраниот духовен раководител.    

Иако постојат 200 негови манускрипти кои се појавиле низ вековите, најраните датираат од десеттиот век. Бил преведуван на грчки, арапски, латински, грузиски, француски, шпански, холански, германски и арапски јазик. Постојат преводи и на различни јазици од словенско говорно подрачје кои потекнуваат од 1676 година па наваму. Преводот направен на македонски јазик е од англиското издание DISCOURSES AND SAYINGS -  Dorotheos of Gaza.

Неговиот спомен се слави на 5 јуни.

КОНТАКТ